梁班子熱廚房嚇怕人，唔少好官都走佬鬆人；前食物及衞生局局長周一嶽亦早走早着，家不知幾逍遙快活。噚日佢又喺機場出現喇，怕且又係出門啦！偶像明星出現喺機場，先至有粉絲主動要求合照啫，點知周一嶽都有呢個「奇遇」，而佢嘅粉絲，竟然係譚校長！
話說譚校長噚日喺個人微博，寫咗一句「在機場內遇見一個喜愛我歌曲的支持者」。究竟邊一位「支持者」值得佢咁隆重其事？咪就係周一嶽囉。大家唔記得，嗰首《忘不了你》嘅懾人「嶽」曲，原唱者就係譚校長咩？譚校長仲上前拉埋周一嶽合照兼豎起拇指，可能係想讚周一嶽成功將佢首本名曲二次創作啩。