一度唔見咗影、被懷疑移民咗去火星嘅財爺曾俊華，最近又忙番，呢頭穩定樓市，嗰頭應付熱錢流入，噚日啱啱結束訪京之行就去咗西九，同旅發局主席田北俊一齊主持美酒佳餚巡禮開幕禮。
噚日天朗氣清，鬍鬚曾可以喺西九忙裏偷閒，吹住海風咁摸住酒杯底，當然係賞心樂事，但佢曾經心臟病要通波仔㗎噃，睇怕都唔敢飲太多美酒；就算飲咗酒呀，都肯定唔敢揸車，唔怕成為酒駕波第二咩。
張宇人食相擒青
唔飲太多酒，都可以試吓美食嘅，好似首次擺檔嘅馬會，就將奪得「2012年美食之最大賞（龍蝦組）」金獎嘅「四喜煙燻龍騰薈」帶到會場，呢味菜式好考功夫，又要拆龍蝦肉又要包腐皮、仲要拎去煙熏，難怪鬍鬚曾試完大讚冇得頂。
但講到為食，佢明顯唔夠立法會飲食界代表張宇人，睇佢嘅擒青食相，佢做飲食界代表真係當之無愧。市民亦可以喺今日起至4號去西九海濱長廊，試盡各地美酒同佳餚㗎。