【本報訊】「能再救多幾個嗎？」南丫島海難造成39死慘劇，事隔30個晚上，一張張垂死掙扎的臉孔，一聲聲哀怨悽厲的求救聲，仍纏擾着救護人員的心。三個救人勇士被封為「英雄」，但午夜夢迴，還是惦掛着被死神拉走的一個，還是會想當初救人的程序能否更完善，坊間對爆窗救人的爭議亦讓他們耿耿於懷。
10月1日海難悲慘，首批到場的消防員黃子翹，至今未能釋懷：「災難後幾日都瞓唔到覺，回想起當時發生嘅事，做嘢嘅困難，我哋同事受嘅傷，諗到呢樣嘢會好唔開心，仲有救唔到嘅，想盡我哋能力救到好多人。」
爆窗決定惹爭議
船身不停下沉，黃子翹發現船內仍有多人拍打着玻璃窗求救，在短短數秒間，他與同事決定打破玻璃窗，「將人救咗先，盡快救得一個得一個，見到入面窗口咁多人喺度呼叫，我哋冇諗到，嗰時有上司話爆窗會唔會有大量海水湧入，但我哋商議過，都係爆咗個窗。」回想當時的場景，他眼泛淚光又說了一遍，「淨係想救得一個得一個」。
事後，爆窗決定引起爭議，對他而言亦是一種糾結，「爆完玻璃後救嘅人數確定唔到，自己都唔知，有幾多人出嚟，有啲爭議。」雖然成功救出多個生還者，但他還是牢牢記掛救不回的那個，「我瞓唔着，因為諗起點解我嗰一刻救唔到佢，我次次都回想起呢一刻。」
救護員曾偉傑至今心情才稍為好轉：「發生咗一個月，頭一陣大家參與救援嘅都好難受，部門有協助，都有同朋友家人傾。」經歷生死瞬間，他體會最深的是珍惜眼前人，「大家都年輕過、挫敗過，想同年輕人講每一次挫敗都係令你成長的一步，唔好睇到其中一個挫敗咁重。」救災人員被視為英雄，消防員許家俊耍手擰頭說：「當日有啲市民未受過訓練，仍然參加救災工作，佢哋先係英雄，因為喺危難時候將自己嘅生命擺到最後。」