一向醉心做導演嘅「香港史匹堡」，做演員嘅時候已經朝住呢個方向發展，好耐之前拍嗰套小本處女作，雖然唔係大賣，但都叫做唔錯。不過自此之後，佢嘅野心就越嚟越厲害，以為自己好掂，近幾年佢拍住同聲同氣嘅「祠堂」搞咗間製作公司，仲畀佢搵到個內地人投資，一次過就畀咗幾億佢開戲。可惜香港史匹堡眼高手低，仲要搵埋自己家人入間公司，一闊三大嘅創業作拍到一半已經超支，原本可以拍三部片嘅錢，差唔多一部就畀佢KO晒，嚇到投資者即刻要佢埋尾，仲搵個自己人監場，最後套戲票房差啲連宣傳費都唔夠。家聽聞班內地老細頂唔順香港史匹堡嘅鬼佬作風，拍埋手上嗰幾套戲就同佢斬纜。
撰文：關仁