私駕路：7系眼有電唇性感　爆星味

睇車同睇明星一樣，每次新裝上陣，熟悉親切感加上新鮮感，已叫Fans欣喜若狂。好似寶馬富豪級旗艦7系，2013款只一抹淡妝小改變，依舊星味澎湃，新設計LED頭燈似向你拋媚眼、電力十足，細長頭唇亦相當性感。毋須整容大翻新，其實已盡得車迷歡心。
記者：徐影龍　攝影：周旭文　模特兒：[email protected]

車頭小改富美感

2013款改變集中喺車頭，頭燈及頭唇更具時代感。

儘管剛被身價近二百萬嘅橙紅色M6震撼過，面對2013款740LiA時，仍被其截然不同嘅高貴感，以及一眼辨認到嘅改變所感動。先有車頭圓形Angel Eyes，改為上下直線設計及換上LED，新舊對比，有種向人眨眼發電嘅媚態；中間經典雙腎式鬼面罩欄柵，由每邊12柱改為9柱式，無咁密集，感覺更靚之餘，亦可提升引擎Turbo進氣效能；而頭唇就最Sexy，入氣位又長又扁，兩側四方形霧燈，有着畫龍點睛效果。至於車尾，氣喉上方有兩道紅色反光板，中間加入電鍍飾邊，為尾泵把及方形氣喉線條美感，添上點綴。車側並無大改變，最凸顯到香檳金車身嘅高貴感，就算擺明屬老闆車身份，但感覺年輕有活力。以上種種改變唔算好大，但親切感加新鮮感，作為小改款就恰到好處。

駕駛艙加入不少桃木裝飾，散發着穩重高貴感。

內櫳豪華超闊落

甫踏入車廂，一貫高級豪華感湧埋身，除座椅線條貼合身體，原來亦全換上更高級嘅皮革物料，難怪咁軟熟溫柔，加上7系3,210mm軸距，座椅空間闊落得嚇人，不論做司機定乘客，舒適度同樣咁高。窩心設計還有在B、C柱及尾箱位置，加強隔音效果，令行車時更寧靜，不會浪費了Bang & Olufsen 16個喇叭嘅靚聲，而且後方配置氣壓式懸掛系統，加上新的橡膠軸承，有效減低行車震動次數，試車時，走了一段不算長嘅路，但其舒適度，已充份令人感受到旗艦豪房嘅值錢之處。
暫時到港型號只有740LiA，3公升唔算好巨肺，不過搭上直六引擎及TwinPower Turbo，馬力達到320匹，配合終在7系現身嘅八速Steptronic波箱，0-100km/h加速只需5.7秒，而油耗亦僅是7.9L/100km，若換上ECO PRO模式，更可慳近兩成油耗。