戀殖旋風呢排喺香港興起，鬼咩，梁班子管治咁差勁，市民難免懷念港英時代嘅好日子。至今仲未搣甩爵士名銜嘅煲呔，顯然好鍾意港英時代嘅管治，因為立法會主席曾鈺成（圖）噚日喺答問大會上，大爆煲呔上任後曾經建議用英文開立法會，但被佢拒絕咗。點解Say No？阿曾冇講，但大家心知肚明，曾主席英文流利，不過黨內兄弟就唔係，唔通要搓胸勤開會封嘴咩！
查實噚日用英文開會嘅討論，係由新民黨田二少引發，佢建議狼英用英文開行會，藉此提升香港嘅國際地位，點知俾曾鈺成插嘴暗寸，話行會會議唔公開，市民冇得旁聽，講英文嚟把鬼。八方就覺得建制派同西環應該大力推行立法會以英文開會，拉布問題，肯定迎刃而解。