滙豐恒生近期齊推手機八達通，電子消費渠道發展勢頭強勁，在港上市公司中，以百富（327）提供嘅電子支付解決方案業務概念最接近，恒生推出有關近距離無線通訊（NFC）技術，百富主流產品早已兼容，潛力不可小覷。
百富主打電子支付產品（EFT-POS）開發及銷售，業務遍佈全球，主打嘅中國市場，合作商戶包括銀聯、中移動（941）、農行（1288）及中行（3988）等，可謂粒粒皆星。內地整體POS終端機滲透率，遠較美國為低，發展空間無限。百富上半年賺8338萬銀，按年升24%，毛利率更增長5.1個百分點至39.4%；最吸引之處在於含金量高，現有9.6億銀淨現金揸手，相當於市值64%；現價年度化市盈率僅9倍，實在抵到爛。百富噚日收報1.45元，升5.1%，一舉突破250日線，轉牛走勢明確，今年累計仍跌14%，明顯落後大市，以今年高位1.69元作目標，可升17%，屆時市盈率都只係10.5倍。
唐牛