金管局日日入市應付熱錢，原來啲熱錢仲要係仆入嚟買ETF，照咁睇中資股同大價股實會俾呢批熱錢掃高。與此同時，內地A股又有起色，滬綜指醞釀緊頭肩底，如果升多2%就突破頸線，後市變得利好；A股得，通常港股非指數股就掂，又有得大炒一番。
另一方面，內地最新採購經理指數（PMI）上番50嘅盛衰分水嶺之上，大家又憧憬內地經濟復蘇，你睇噚日航運股、水泥股、內房股、紙業股升到爆錶，就知經濟復蘇預期幾咁緊要。如果係咁，一批跟隨經濟周期起落嘅股份，實會有排炒。綜合上述因素，係咪嚟緊乜都會升，搞到雞犬皆升？
受惠上述情況嘅股份，真係多到數唔晒，連爆幾棍嗰批航運股同紙業股，基本上無謂焗追，因為市場上選擇多的是。如果從上述嘅市場預期去估有乜嘢股份跑得出，相信中資背景嘅券商股都係一個機會。
醞釀突破上升旗形
內地券商股可以數中信証券（6030）同海通證券（6837），因為A股ETF啲熱錢湧埋嚟，佢哋生意就多咗，可以直接受惠，業務亦同經濟周期有一定關係。不過，海通證券前收市價10.30元，都幾近招股價10.60元，可能樓上累積唔少蟹貨，至於中信証券前收市價14.88元，亦去到15至17元嘅蟹貨區，都有機會窒礙股價升勢。
要再數中資背景嘅券商股，就可數埋國泰君安（1788），佢專做港股生意，一樣受惠熱錢流入，個市近期好番，睇嚟IPO又可能會熱鬧番，對於近年積極進攻IPO生意嘅國泰君安好有利，股價實跟市升。論估值，市賬率1.2倍，對於呢隻有持續盈利能力、有中資背景支持嘅本地券商股嚟講，有長揸價值。
國泰君安前日守住日線圖保歷加通道中軸，噚日即升3.5%至2.38元，醞釀突破上升旗形，交投亦大增，個圖靚仔晒。周線圖亦都突破保歷加通道中軸阻力，嚟緊中線升勢可能一帆風順，短線可以博佢上番2.60元，中線嘅話，挑戰6月高位就可以睇3元。
晉佳
本欄逢周一、三及五刊出