89歲前基本法委員會副主任黃保欣，早年擔任多項公職，07年正式退下火線，近年亦越來越少公開露面，淡出政壇，反而佢位公子黃友嘉就喺政壇越來越活躍。中國電子（085）噚日宣佈，黃保欣因年齡原因辭任獨立非執董，似乎連商界都想全退下來喎。
開會次數高過執董
保欣叔做公職不遺餘力，估唔到做獨董亦相當盡責。根據聯交所資料，保欣叔舊年係七間上市公司獨董，翻查年報，單係出席董事會次數合共就有25次，喺唔少公司嘅出席率仲要高過啲執董，以一位年近90嘅老人家來講，相當勤力。可能辛苦過頭，保欣叔舊年底已經辭咗愛高（328）獨董，家陣又辭埋中國電子，剩底聯合集團（373）、銀創（706）、明發（846）、深圳控股（604）同中石化冠德（934），唔知嚟緊會唔會逐一辭去董事職位，真正全身而退呢？