唔少港人近期積極捍衞本土價值同歷史文化，唔單止四出「捉拿」殘體字蹤影，有眼利市民近日更發現牛頭角市政大廈嘅揭幕石碑，上面嘅市政局標誌竟然俾人用印有食環署標誌嘅紙遮住咗，批評此舉唔尊重歷史，擔心先例一開，所有港英時代嘅公共建築開幕紀念碑都會受到如此對待，矛頭明顯指向食環署。文化人陳雲更加狠批港共政府係蠻夷政權，侮辱香港歷史。
八方噚日就問過食環署，佢哋只係話知道件事後，即刻派人去巡視，的確發現揭幕紀念石匾上嘅前市政局標誌被遮蓋，已經即時移走遮蓋物，但就冇講到，究竟係咪佢哋貼咗自己個標誌上去遮住前朝歷史囉。