狼英政府推出雙辣招壓樓市，不過強國客冇有怕，繼續南下掃貨，其實用人仔買港樓，所賺嘅滙水夠畀BSD有餘，變相當一兌一交易，感覺上依然抵買，真正有錢嘅同胞係唔會介意畀多15%，所以相信Case會陸續有來。金管局再向市場注資27億銀，反映熱錢繼續湧港，聚焦各種投資工具以爭取回報。最可憐係香港一班無殼蝸牛，貪曾同狼英令樓價失控，上唔到車仲要捱貴租，莫講話買樓抗通脹，百物騰貴之下，想唔做月光族都難。講番股市，資金照舊追捧績優股，中海集運（2866）Q3由虧轉盈，中鐵（390）第三季純利亦增近七成，消息令航運同鐵路板塊炒到飛起。在港經營商場及車位嘅置富產業信託（778），Q3業績亦唔失禮，總收入及物業收入淨額齊齊增長23%，現價年度化收益率仲有5.2厘，PB 0.8倍都唔夠，雖然Size同領匯（823）差一大截，但估值明顯較吸引，難怪噚日再創新高，再上一層樓應無難度。唐牛