迪士尼宣佈以40.5億美金收購《星球大戰》嘅製片公司，2015年推續集。對《星戰》死硬Fans嚟講絕對係惡夢。本來一班絕地武士、黑武士仲喺遙遠嘅星球飄蕩，點知米老鼠一個唔該，硬將佢哋拉番地球，去迪士尼一齊怪叫：「It's magic!」你都咪話唔驚。
不過在商言商，《星戰》對迪士尼的確係一個金礦。35年前開始播後傳，去到05年播埋前傳最後一集，即係無論50後定90後，多少都會對《星戰》有情義結。就算Fans唔想有續集，但一上畫，自不然有「原力」推佢哋入戲院，觀眾群夠大，仲要有票房保證，嚟緊7、8、9集無限拍，仲有一系列周邊產品，認真財源滾滾。加埋迪士尼收購Marvel後炮製《復仇者聯盟》，第三季業績創新高，仲唔食過番尋味？
𠵱家但願迪士尼將《星戰》拍得好好睇睇，唔好令Fans失望，May the force be with you, Disney。
Fifi
本欄逢周二、四刊出