勝訴二少甘琨禮昨一臉嚴肅，對於母親怨他「逼死大哥」、法官指他對大哥「不公平欺壓」均不予置評，只說「天地良心」。其兒子連宏昨早到法庭領取判詞，面露笑容稱對判決非常滿意，堅持自己遭抹黑。家醜外傳，又被指間接令甘健成離世，影響家人感情，連宏竟說「其實冇乜特別感覺」。
甘蕎因：我哋好委屈
連宏又揚言「案件係由伯父做呈請人告我哋嘅，我哋一路勸對方唔好打上法庭，而家佢哋想走，調番轉法庭將成單案撤銷，反而冇咗個買賣，成件事仲尷尬」。
琨禮一家及後在鏞記店內舉行記招，被問及「有冇對大哥唔住」，他指「絕對冇嘅……幾廿年嘅事，好難係庭上用三四個字反映……你同女朋友鬧交，個內容點樣，不足為外人道」。女兒蕎因補充「我哋其實好委屈嘅」。
甘琨禮又稱「握手都要對方主動伸手先得」，相信與母親及大哥一家「破唔到冰」，但聲稱會永遠懷念大哥，若他仍在生，「我希望佢唔好去搞清盤呢啲咁嘅行動，大家將間公司發揚光大」。
妹妹甘美玲則明踩暗撐幫口，「二哥嘅缺點係唔鍾意出嚟講太多傷害人嘅嘢，二哥管幕後，對於門面、交際應酬，冇大哥咁完美」。
《蘋果》記者