能夠喺NBA東岸挑戰熱火王位，溜馬係其中一隊；不過未開季呢支強豪已遇上沉重打擊，小前鋒格蘭加（圖）因為左膝舊患復發，要無限期休戰，周三開鑼戰作客速龍肯定缺陣。格蘭加上季平均攻入18.7分，係球隊首席得分點，仲入選埋明星隊㖭。教練禾基已經準備提升佐治希爾上正選，但級數有別，溜馬要維持上季黑馬本色都幾難。