前特首董建華由全國政協副主席，「升呢」做全國人大副委員長幾乎係既定事實；而佢若然要「升呢」，一定要先參選人大代表。但負責選出港區人大嘅選委會中，唐營中人唔少；一心做票王嘅老董，如果低票當選真係好冇面噃，據聞有人建議佢走精面，考慮改循廣東省出線，老董會點揀呢？
參選篤定做票王
八方聽聞老董周一晚喺中環香港會設宴，請嚟唔少政界好友，煲呔、鄉議局主席劉皇發同行會成員查史美倫都係座上客。係咪提早祝捷？八方唔敢講，但肯定佢喺內地政壇嘅仕途肯定更上一層樓，因為佢同「儲君」習近平老友鬼鬼。但正當大家以為老董一定要選港區人大代表，藉此入閘時，有人話未必！原來政界中人議論紛紛，話有成1,800人嘅人大選委會內，唔少都係唐營中人；若然撐狼英當選嘅老董去馬，唐營會唔會玩嘢唔畀飛？一切真係講唔埋。據聞有人獻計，叫老董不如改循廣東省出選，靠橡皮圖章，老董篤定做票王，使乜喺香港參選拉票咁辛苦？不過有人話此路有難度，事關若然要喺廣東出線，應該要有廣東戶籍，老董係香港人，祖籍浙江，「落戶」廣東於理不合咁話。不過世事無絕對，喺中央操盤下，凡事沒有不可能，可能中央「特事特辦」㗎？mailto:[email protected]