海迪已經有好一段時間冇幫襯翠華了。作為消費者，我唔明白點解一杯凍奶茶要19蚊，一餐簡單晚飯隨時要80、90蚊落樓。不過，海迪唔buy，仲有好多遊客同強國人喜歡，如內地上市公司的老總們。其中，國美（493）前主席陳曉，聞說都是翠華fans，來香港開會總叫翠華咖喱牛腩外賣。翠華近年加價不遺餘力，食水咁深，咁佢啲股票喺咪就買得過？睇翠華過去一年（佢嘅財年係截2012年3月）的純利，大升60%，好勁。但增長主要係來自員工成本下降，帶動EBIT margin急升2.7個百分點。事緣舊年5月，最低工資實施之前，翠華取消員工的雙糧，改做表現花紅制，變相減人工，唔怪得成為逆市奇葩。但呢啲招數可一不可再，翠華未來要增長，靠中、港兩地勁開舖，今年度開10間，加幅喺50%，加上係喺內地發展經驗尚淺，執行風險唔細。以效率計，翠華肯定喺賺錢能力最高的茶餐廳，回本快，每日翻枱11次。但大舉開舖之後，同店增長、翻枱能力會被攤薄，咁高的盈利能力很難維持。以截至2013年3月的財年計，翠華想賣股的估值大概有21至27倍，比起大家樂（341）的25倍，其實唔算特別平。海迪