喺思捷（330）打工認真唔簡單，做咗三年幾掌櫃嘅周福安，舊年12月以「唔想周圍飛」為由辭職，仲要做到今年年中先走得。佢見自己50歲喇，4月走去做身體檢查，竟然發現患有高血壓。睇怕思捷一班新高層都要得閒做吓身體檢查先得，有病都可以及早醫吖嘛！周福安離開思捷冇耐，轉頭過咗去麗展系幫林建岳，返咗五個月工，前晚終於蒲頭講業績。
做思捷周圍飛 搞到高血壓
大家見周福安清減咗都戥佢高興，原來佢有苦自己知，佢曾經患上高血壓。醫生本來勸佢食降血壓藥，但佢唔想一直食藥嚟控制血壓，選擇自然療法，寧願每朝6點幾就爬起身去游水半粒鐘，希望靠做運動改善情況，結果10月初覆診，血壓正常番晒。多得日日做運動，佢輕易減咗10磅，衫褲都要攞去改兩次，遲啲希望減埋個肚腩喎。咁都唔難，事關佢話離開思捷之後，唔使周圍飛，多咗時間打番壁球，仲已經報名參加比賽。