羅力威前晚同江若琳喺九展幫一個音樂比賽做嘉賓，有傳被老闆拆散鴛鴦嘅羅力威，提起女友雨僑甚避忌，問佢有冇為女友寫歌？佢話：「吓，邊個呀？之前幫佢（雨僑）寫過，𠵱家忙幫自己寫。」佢又話唔會一齊慶祝哈囉喂，之前同公司同事去玩就當慶祝咗。羅力威噚日又去咗九展出席商台記者會，佢再強調同雨僑唔係情侶。至於被稱為二打六歌星，佢話：「兩個打六個幾型呀！」