恭喜恭喜！今年娛樂圈可謂喜事重重，34歲嘅新加坡天后孫燕姿前晚喺新加坡順產，為荷蘭籍老公納迪姆（Nadim Van DerRos）生咗個龍仔，重3.4公斤（7.4磅），母子平安。榮升老竇嘅納迪姆梗係開心啦，仲喺facebook用英文留言：「Halloween前一天，似乎少咗啲恐怖，尤其當你有一個健康嘅男嬰出現。」
母子平安
燕姿透過個人工作室Make Music公佈喜訊，透露囝囝重3.4公斤，母子平安，不過原來新加坡嘅習俗同香港唔同，燕姿跟住會進入四個月嘅坐月期，係呀！冇睇錯，係四個月後坐完月至開工呀！至於燕姿之後嘅工作安排，公司話會保留空間按照佢嘅復元狀況進行調整，坐月期間會謝絕所有工作同訪問，稍後復工時就會通知大家。
目前預計燕姿會住院三日，返屋企就由孫媽媽陪佢坐月，整啲補品幫佢調理身體。至於燕姿嘅好友蔡依林，早排已經送咗部BB車做禮物，佢噚日恭喜燕姿終於「卸貨」，又預計明年1月去新加坡演出時順便探吓佢兩母子。
