踏入11月，有好多大事發生，美國總統大選、中共十八大會議，仲有霍啟剛同郭晶晶嘅世紀婚禮，要關注的事實在太多了。聽講，11月11號喺會展舉行嘅「剛晶大婚」，已經敲定由藝人曾志偉同埋無綫財經節目《創富坊》主持朱凱婷做婚禮司儀。
霍啟剛同郭晶晶嘅世紀婚禮下星期正式展開，用「展開」嚟講一啲都冇錯，事關一對新人8至10號會先返鄉下，喺霍家旗下番禺南沙大酒店連擺三日喜酒，11號先至喺香港會展舉行婚禮。
女司儀人選千挑百選
香港婚禮已經請來曾志偉同埋朱凱婷做司儀，聽講主人家一早預咗請曾志偉，女司儀就諗咗一段時間，想搵一位高雅大方、談吐得體，兼且見慣大場面嘅女士。
要符合以上條件，最啱就係喺準奶奶，即係「最美麗港姐」朱玲玲班港姐朋友入面搵，朱凱婷咪就係「慧妍雅集」其中一員囉。
朱凱婷中大畢業，01年參選港姐得季軍，最近五、六年開始做電台、電視台財經節目，見得佢最多係喺《創富坊》。唔知到時佢會唔會整鬼一對新人，要求佢哋好似分析員揀股咁，講吓點解揀中對方呢，仲要係長線投資喎。
李華華
mailto:[email protected]
