民主黨涂謹申自從榮升Daddy後，除咗繼續做FBI偵查政界離奇事，開口埋口都有唔少湊仔經。佢似乎亦好在意，想由細培養囝囝信之嘅政治觸覺，不時帶囝囝去立法會參觀。萬聖節出世嘅信之噚日一歲生日，但佢冇得喺老麥開Party，反而喺立法會一日遊，陪爸爸開會當慶祝，唔通阿涂覺得，立法會最多嘩鬼，去立法會慶生最適合？八方幾個月冇見信之，見佢眼仔睩睩，又醒目咗好多，而且已經識行識走，大個仔得好快噃。阿涂話呀，信之仲未識得叫爸爸同媽媽㗎，但佢人生中學會講嘅第一句說話，竟然係「唔好」，搞到佢兩公婆唔知好嬲定好笑。