金管局總裁陳德霖（攞命陳）同新任證監會主席唐家成（Carlson），除咗分別係銀行同證券業監管機構阿頭、喺金融界舉足輕重之外，仲有一個共通點，原來兩人係同年同月同日生，噚日過58歲生日，可惜陳總身在北京，否則兩人可以一齊慶生。
都話男人特別襟老，橫睇掂睇，攞命陳同Carlson點都唔似年近花甲嘅老人家，但兩人真係喺1954年10月30號出世，係咪喺埋同一間醫院就唔知嘞，但家陣齊齊做香港兩大金融監管機構阿頭，都算有緣。
金融海嘯後，全球都話加強監管，兩人以後有好多機會坐埋傾偈，唔只齋傾外滙基金諮詢委員會啲嘢（兩人同屬委員）。
咁啱證監會非執董、貝克麥堅時律師事務所嘅香港、中國及越南辦事處主席李金鴻都係噚日生日，三位仁兄已經互相以短訊講句Happy Birthday。唔知同攞命陳一齊喺北京見緊中央財金官員嘅財爺曾俊華，噚日有冇攞個驚喜蛋糕出來畀陳總呢？
Carlson年底抱孫
講番Carlson，佢舊年退休前係畢馬威中國主席，之後接咗幾份公職，除咗證監，仲做埋體育學院同英基學校協會主席，可謂周身唔得閒，嚟緊佢仲第一次做外公，忙住湊孫，事關佢位千金12月1號生得，恭喜晒！
李華華
mailto:[email protected]