大學行走這十多年，我見證着學生的變化，無論行為思想學習態度可謂「王小二拜年」（意謂：一年不如一年），居然還未麻木，不知是好事還是壞事。要數我最為驚訝又無法接受的是，莫過於大學生們沒有閱讀報紙以及新聞的習慣！即使所謂有，都只是搭車返學順手攞的免費報紙。這些「隨手報」受篇幅頁數所限，報道內容自然亦非常有限，頂多鳳毛麟角肯定不會深入。而且我話傳媒立場中立沒有偏頗你信不信？盡信書尚且不如無書，何況報紙？不多睇幾個版本來參考推敲，怎可能有個人看法心得？我們讀書求學問，不是為了培養獨立及批判性思考的嗎？
今日電腦智能手機如此普及，上網睇中外報紙及各新聞網站既免費又方便，學生之所以唔睇，完全是他們的選擇，這個才是令我最為痛心、傷心又覺最可悲的事實！不要講以前初出茅廬個個月真金白銀幾百蚊訂報，一日之計就是晨咁早刨足幾份中英文報紙才開工，還未計那些雜誌周刊。
時至今日，無論幾早起身準備工作也好，我一定先花一點時間上網看看各報紙頭條，及國際大事，內容頂多之後再找時間細讀。我在講座中的提問，即使是很新鮮熱辣的新聞，能答得上嘴的沒有幾個！
就以今屆諾貝爾文學獎得主是誰為例，消息宣佈後連續幾天我在大學有課，問過大大話話過百個學生，答得出的同學不超過十個，有部份不太敢肯定「不過好似係莫言」。大家請準備好接受嚇人的事實，答「唔知」學生居然有差不多一半！再問誰是第一位華裔得獎人？只得一個答得出正確全名。這位作家的國籍呢？沒有一個猜得中！
究竟是否我多事自找麻煩庸人自擾？
張慧敏
http://www.facebook.com/HKcareerdoctor