屯門地震！港甲「4哥」屯門因會長陳強捲入賄選醜聞被調查，早前宣佈辭職，球會閂水喉情況下，教練甄力健同李海強等超過10位高薪職球員，噚日齊接大信封；苦主之一嘅兩屆「足球先生」李海強，對班主又一次搞死球隊嘅情況表示心灰意冷。
屯門今季大換血，除有李海強從南華來投，仲引入迪高同丹尼爾等3件巴西新援，開季交出3勝3和1負嘅戰績，成績相當唔錯，上個禮拜仲逼和傑志㖭。不過，會長陳強早前出戰立法會新界西選舉落敗，事後被踢爆涉嫌賄選，家陣接受廉署調查，可能係咁分身不暇，要暫別球壇。
失大水喉裁職球員10人
其實陳強來頭唔小，既為廣東省政協常委，又係新界總商會及德強地產董事，前季豪擲200萬港元贊助，做屯門會長；我求大俠收到風，出手闊綽嘅陳生今季仲加咗贊助費，希望球隊有好成績，點知最後爛尾收場。
屯門冇咗條大水喉，自然要節流，噚朝宣佈棄用10位職球員，包括教練甄力健、助教潘文俊同梁卓長，球員亦有莫斯奧、丹尼爾、李海強、凌琮、李明、葉子俊同黎耀昌齊齊收大信封，留底嘅都要減薪3成。
雖然隊長比圖同中場迪高冇收信，不過，佢哋決定同兩個巴西同鄉共同進退。總監盧光中噚日證實，球會因為突然少咗贊助，所以要同教練、高薪球員解約，事件亦通知咗足總，盧光中自己就會接手球隊教鞭。
由於事前冇任何風聲，職球員噚日練完波聽到呢個消息都呆咗，強哥仲話，今季雄心壯志加盟，諗住屯門可以去到另一個層次，點知未到季中竟收解僱信：「以為國內球會先會爛尾，點知香港都有，家陣真係心灰意冷。」35歲嘅李海強，稍後同球會傾解約條件，至於仲踢唔踢，佢話其他球隊都埋晒班，真係有困難；至於教練甄力健話今日會同高層開會，暫時亦會繼續帶住隊波先。
本地波成日被外界譏笑為老細足球，今次屯門會長陳強突然唔玩，主力同職員被裁，實力大減，自然影響成個聯賽嘅形勢，目前有12分嘅屯門，嚟緊下月11號喺大球場作客對南華。
近年港甲球隊爛尾事件
球會：屯門普高
球季：09/10
事件：前港腳任煒雄任會長的屯門普高宣稱，因國內贊助商不再注資，最終因沒為球員買勞保被足總取消參賽資格。
球會：香雪製藥
球季：05/06
事件：國內球會香雪製藥第4季來港角逐，但到季中突通知足總缺經費下退出，足總為保參賽隊數，以香港08代替。
球會：奇利寶流浪
球季：99/00
事件：流浪獲奇利寶冠名贊助，更從南華羅致歐偉倫及加連奴域等，但贊助商季前甩底，流浪在缺班費下改組青春班。
球會：米芝路
球季：92/93
事件：商業球隊米芝路班主生意不景，球季結束前已開始拖欠部份球員薪金，之後放棄會籍，翌季易名聲控通。
資料來源：《蘋果》資料室