英國有研究發現，睇恐怖片消耗嘅熱量相當於散步半小時，功效最大嘅係唐牛細個睇完幾晚瞓唔着嘅《閃靈》，其實狼英政府家立立亂，一舉一動猶如恐怖片劇情，香港人好快唔使再幫襯瘦身公司。
港式茶餐廳翠華正籌備上市，根據保薦人德銀所講，2013年（3月結）預測市盈率介乎17至21倍。睇番本港兩大快餐股大家樂（341）及大快活（052），彭博綜合券商預測市盈率分別為25倍及15倍，以估值計，大快活較大家樂及翠華分別折讓四成及12%（下限計），明顯更可取。大快活另一吸引之處在於派息穩定，由2005年起從不間斷，近兩年仲有特別息。現價息率超過6厘，比起唔少REITs仲要高，就算唔計特別息，都有近4厘打底，防守力強。大快活噚日收報16.10元，升2%，9月至今行咗個靚圓底，10日線更一舉升破20日及50日線，形成兩個黃金交叉，突破今年高位16.72元只係時間問題。
唐牛