娛樂圈爆生女潮，黎姿同朱茵啱啱先生完B女，37歲嘅羅敏莊噚日亦都剖腹誕下愛女陳禛，小B女好健康，重7磅3，個樣似足縮水版嘅媽咪，仲中氣十足，一出世就擘大個口，好似學媽咪唱歌一樣。有陪老婆入產房嘅陳國邦就負責剪臍帶，阿邦話B女臍帶似足生腸，佢話：「好感動，B女個名係我改，祈求上天畀女兒好大幸福。」阿邦講明想喺兩年後再追多個，升呢做爸爸嘅阿邦提起愛女就好雀躍，因為無綫《東張西望》嚟咗採訪，所以愛女一出世就識賺騷錢，真係好好腳頭，就連阮兆祥都爭住認做B女嘅契爺㖭。
此外，臨盆在即嘅孫燕姿如無意外應該會係噚晚或今日生得，佢媽咪前晚喺Twitter預告：「現在全家都很緊張地期待。」令唔少粉絲都等得好心急。撰文：洪紅克
