以低佣搶客見稱嘅致富證券揸住好多舖，政府推出「曾兩招」搞到樓市冇得玩，炒家焗住玩舖，致富即時受惠，輕易賣出觀塘舖套現4500萬，買家係英皇國際（163）大股東楊受成嘅細佬楊超成。個舖兩邊係雜貨店同生果，斷估楊生暫時唔會喺度賣珠寶咁趣致啩。
致富喺觀塘瑞和街67號永輝大樓地下D舖分店，剛以4500萬成交，呢個舖位連埋閣樓夾埋1470呎，致富06年尾用1265萬買入，一直自用，今次賣出賬面賺3235萬，個舖六年唔夠升值2.6倍，都話投資磚頭保值啦。
個舖就快交吉，唔知致富會唔會喺第二度開過間分店，不過佢仲有13間自己舖，有啲喺市場放售緊，聽聞深水埗福華街個舖就叫緊5000萬。