聯儲局主席伯南克又迫特區政府出招，進一步令特區政府要蠶食經濟自由。非港人、公司買樓被歧視，即係又締造一批會玩屈機攞着數嘅人頭戶，更令雙非孕婦有誘因嚟香港產子。真係瘋了。
不過，今次最慘係根本冇得鬧特區政府。連孫柏文都係鬧伯南克，同誠心求神，希望花旗國人可以盡快結束伯南克嘅瘋癲。
聽聞下一步，特區政府要限制商舖買賣，我哋要堅決反對。咁做生意嘅人，唔使諗買舖啦？話舖價升，令做生意成本上升，根本就係唔明世界運作。
租先係成本或機會成本，家舖價升，係啲買家不斷接受更低嘅租金回報率。租能升，係因為租舖嗰個更有效喺裏面提供產品及服務。
廣東道冇晒地舖食肆，咪就係因為個舖位最有效用嘅方法，唔係賣嘢食。
而嗰啲食物，如果好食，係一定會繼續喺其他地方供應，唯一會停止供應，係因為嗰個老闆唔貪錢。
家睇政府話想限制商舖買賣，我嘅心態有如《金陵十三釵》咁。你要強姦住宅樓市，都唔好搞商業舖位呢個處女市場。
價格跳動，係令所有人調整做嘢方法嘅最好同最有效方法。一旦開始價格管制，就會衍生一大班屈機搵着數嘅既得利益者，同埋勁嘥社會資源。
政府造就搵錢機會
當然，有政府扭曲市場，就有搵錢嘅機會。家舖位價格將會開始反映政府會有措施，咁因為買舖可以做嘅槓桿比買股票大，亦因只要有供款，唔會俾人call loan，所以租金回報已經極低，比起領匯（823）嘅股息仲低。所以，如果你係冇槓桿咁揸住個舖位，應該沽咗個舖位買領匯，因為揸領匯好過揸舖。
孫柏文
作者為獨立股評人
http://facebook.com/shuen
本欄逢周二刊出