呢幾年學識咗一個潮語，就係單一個「水」字 ，並作動詞用。譬如說：「你唔好水我喎！」意思即係，「你唔好呃我」又或者「呢單刁，俾人水咗！」就好明顯係指某單交易吃了虧。
我不是潮語專家，只是用家，所以未曾考究此用語出處何來，望有識者賜教，惟感覺呢個字形神俱備，尤其是形容最近小城的一些事，配以此「水」簡直係恰到好處。
想說的，就是港澳辦前副主任陳佐洱，繼早前藉新書發佈狠批殖民宗主英國從來都是「寡情薄意」，只把香港當作「提款機」，豈及祖國的「濃情厚愛」。
又話龍獅旗一舉，場面叫人痛心，今日更將此情此景定性為「港獨」，一邊亂扣帽子，一邊曉以大義，並引述另一位前主任魯平的說法，揚言若沒有內地的支持，供水予港，這裏早成死城。
其實類似有關的言論，我細細個都已經聽得多，嗰陣除咗話供水以外，仲有本港副食品嘅穩定供應，都係要多得內地對香港人嘅眷顧，我差點就信以為真，因為在那時候，的確每年都要將一大堆的糧油食品罐頭之類運送回鄉。
買貴水仲被屈忘恩負義
心裏想着，鄉親父老寧捱物資短缺之苦，也要確保港澳同胞的生活水平，此情何堪？不過後來先知，原來鄉下嗰啲官員幹部，佢哋從來都另有門路能夠「自給自足」，至於老百姓，根本就是沒有條件去追求生存以外的物質要求。而在「世界工廠」尚未全力投產之前，那些僅有的出口貨品卻已為國家創造不可取替的外滙來源。
所以國家並不是要養育香港，才輸出食品，況且那還是回歸前早早已發生的事，正如東江水不是為了救活港人才輸送到此。這不過就是互惠互利，甚至於如昨日丘亦生所寫「無拖無欠」的一件事，說不上祖國對我們有多大恩德，正如中電和港燈收咗我哋咁耐電費，難道要市民多謝番佢轉頭？
再者家陣就算要加電費，政府都不得不扮晒為民請命，與兩電周旋一下。但係我哋又點能期望現政府會同廣東省政府或旗下嘅上市公司「廣東水務」企硬。所以購買東江水嘅費用，只加不減，而市民的負擔未有增加只因有公帑補貼差價，講到尾，咪又係港人「包底」。
同理而言，若有人公然倡議政府推行電費津貼以保障市民生活，咁都唔俾人鬧民粹主義同官商勾結，我真係乜都得。
爭啲都唔記得計，同樣的東江水，我哋埋單嘅水費都要係深圳好幾倍，到底係本港嘅「附加工值」真係咁高？又或如媒體幾年前已作報道，超額供港的水只能倒（錢）入海，既浪費食水，復白白虛耗公帑？又或徹頭徹尾只係相關單位「食水好深」？
陸客落嚟買貴嘢就叫振興香港經濟；我哋要買貴水就係「被照顧」。被「水」本已氣憤難平，仲要俾人「屈」忘恩負義，你叫市民點唔心萌本港獨力發展分散供水途徑（簡稱「港獨散水」）的想法。
盧先亞