謝霆鋒同前妻張栢芝離婚後，佢哋依然愛錫一對囝囝，關係更勝從前，霆鋒早前訪問自爆皮膚癌後，栢芝同謝家一對寶貝Lucas同Quintus都未有露過面，佢哋三人又缺席過氣奶奶狄波拉上周五嘅生日P，據知栢芝帶咗囝囝去加拿大探家姐。
加國低調返港
栢芝近年復出後票房仆直，未有工開，佢惟有將所有時間精神放喺一對囝囝身上，呢頭話佢湊仔去加國玩樂，轉眼佢又低調返歸，噚日仲有人見到佢接大仔Lucas放學，母子算係霆鋒自爆癌症後首度在港現身，栢芝唔單止戴住墨鏡遮住素顏，佢全身仲包到冚，雖然呢幾日天氣轉凉，但栢芝已戴上冷帽，打扮有啲誇張，佢好似將加國嚴冬look搬埋返香港一樣。
孭住背囊仔嘅Lucas放學時仲好活力充沛，見到媽咪嚟接放學，佢興奮到馬上走上前愛嘅抱抱，栢芝同Lucas原來都着住母子裝，一齊着咗黑色legging，不過栢芝一對香雞腳，瘦到嚇死人。