政府落重藥打壓樓市，地產股全線反艇，但延長SSD至3年並調高稅率，向非本港居民買家徵稅（BSD），完全無助市民上車，前者更令市場供應進一步減少，點都睇唔出係惠民措施。不過都好正常，局長連樓市長升長有都覺得奇怪，又點會諗到計仔幫市民上車哩。
地產股拖低恒指，但H指依然堅挺，數據顯示，追捧中國股票基金嘅資金創海嘯以來新高，現階段炒中資股較穩陣，又以國策受惠股最值得憧憬。有內地報章指，第二批金太陽示範工程即將啟動，涉資逾700億人仔，帶動光伏股全線爆上，卡姆丹克（712）噚日呈破腳穿頭形態，走勢一流。撇除購回可換股債券及註銷認股權證嘅非現金會計費用，中期純利錄得5820萬人仔，年度化PE不足8倍，以國策股計非常便宜。卡姆丹克噚日收報0.92元，候0.90元吸納，以9倍PE作目標，可見1.13元，潛在升幅23%，跌穿0.85元止蝕。
唐牛