【咖喱篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
球證一次又一次嘅爭議性判決，除了引起球迷同球員嘅罵戰，仲帶起咗引入科技協助球證執法嘅課題。相比籃球、網球同排球，足球喺呢方面簡直大幅落後！由N年前曼聯門將卡路爾喺網入面撈番個波出嚟而球證睇唔到，到林柏特喺上屆世界盃對德國過晒白界線嘅入波被判無效，門線技術已經傾咗唔知幾耐，到最近先拍板，會喺年尾嘅世冠盃試行。睇吓個波過晒界未呢啲技術已經喺網球比賽用咗好幾年，而且運作得好理想，但喺足球界就議而不決，拖咗好多年，間中歐洲足協會長柏天尼仲會走出嚟講足球係人性化運動、球證錯判都係比賽一部份呢啲鬼話連篇嘅說話。門線技術乃大勢所趨，快將實行，但呢個唔應該係終點，而係足球引入科技協助執法嘅起點。電視機觀眾同講波佬可以透過慢鏡仔細分析一啲爭議性嘅犯規，但可左右一場波勝負嘅球證卻要單憑雙眼，去判斷電光火石間嘅犯規動作，請問呢個係咩道理？保持球賽流暢性？為咗可觀性而令比賽欠缺公正，咁又係咪本末倒置！長遠嚟講，或者應該畀參賽隊伍一兩個挑戰裁判嘅機會，例如喺罰判12碼或者紅牌呢啲重大判決時，球隊有權要求球證翻看慢鏡。用少少時間，換取球賽嘅公正，係值得嘅。文：咖喱