每次中港掀罵戰，強國人一定會話：「你唔諗吓飲緊嘅水邊度嚟？」難道按照國情，香港人唔只望國旗要喊，連望住杯水都要歌頌祖國賜水之恩，感激流涕？就算係流淚，都係因肉赤而流淚。
噚日《金融中心》丘亦生專欄指出，當年係因香港肯簽30年長命約，持有東江水嘅粵投（270）先避過破產一劫。咁計香港直頭係「送暖到中國」，再者港府買水嘅價錢，係東莞及深圳嘅幾倍。如硬套母子情去解構中港關係，港人豈不是要呼叫：「娘親，你偏心！」
再睇星、馬呢對冤家，雖唔妥對方，但偏偏星洲有四成水來自馬來西亞。大馬02年扭計加價，理據係當時香港向中國買水每立方米要8馬幣，比星洲價高260倍。最後星洲以運作成本唔同耍走對方，但就反映香港貴到一個可供他國借題發揮嘅地步。再者，東江水係明買明賣，又唔見馬國搬出「星洲人冇我會渴死」此等小學雞論據。要港人感激內地賣水，咁內地人會否感激香港提供豪宅畀你炒先？
Fifi
本欄逢周二、四刊出