潮牌I.T（999）老闆沈嘉偉出名唔鍾意講嘢，但前年開始，每年兩度出嚟主持業績記者會，仲次次交到功課，今年零售市道轉差，I.T成日被人話減價促銷，好似唔多掂，沈老闆竟然選擇今日公佈中期業績，唔見記者，分析員會議亦由中環蘭桂坊酒店，改為香港仔公司總部，唔知呢啲細節對佢份業績有冇啟示作用呢？
大部份分析員都喺中環、金鐘、九龍站ICC返工，要收市後山長水遠趕去香港仔，都咪話唔頭痕，大摩、瑞信同德銀嘅分析員不妨考慮約埋一齊喺ICC坐的士過海。
其實做得上市公司，管理層就應該多啲露面俾人問問題，向股東交代吓，何況I.T最近仲減價減到嚇親人，轉季冇耐，已經要推mid-season sale，呢啲大時大節更要解釋多啲，點解要選擇性淨係搵分析員講呢？話晒呢隻股曾經被芬佬稱為「must-buy item」吖。