最近重返行會嘅葉劉淑儀，早幾日話畀華華同事李八方知，佢今年好早就收到英國名牌Aquascutum嘅六折卡，反映零售市道唔多好。咪以為葉劉崇洋，查實Aquascutum屬於本港老牌製衣商陳瑞球家族嘅YGM（375），葉劉支持本土企業至真。YGM持有Aquascutum分銷權好耐，後者破產，YGM今年5月索性買起佢。呢個品牌最近搵天后鄭秀文賣廣告，都好潮㗎。
YGM主席陳永奎今年中喺業績會曾經好感慨咁話，二、三十年前，Aquascutum同Burberry喺乾濕褸界堪稱一時瑜亮，幾番風雨，Burberry仍然係市場一哥，Aquascutum未能爭鋒。雖然係咁，陳主席堅持公司唔會好似Burberry咁谷個品牌，維持一定知名度就夠。睇嚟陳主席真係唔使做太多宣傳，不如諗吓贊助葉劉，叫佢日日着唔同款式出入立法會啦。