全宇宙首隻「雙幣雙股」合和公路（港元上市編號737、人仔上市編號80737），昨日人仔股票初次登場，力守配股價3.22元人民幣，成交方面都算唔錯。原本今次合和公路發全新股，慣例要T+5先有得交收，但今次特批T+2就搞掂。聞說係有人想搶先新交所，飲到「雙幣雙股」頭啖湯；結果新加坡隻「雙幣雙股」IPO最後因反應唔好先撻Q。今次可以話係天助小加也。
有投行人士形容，合和公路的人仔配股，勝在timing掌握得好，咁啱人民幣創新高，大家對人仔升值有番少少憧憬。他指今次合和公路主要都係受零售及私人銀行客戶歡迎，貪佢yield高，有近8厘，但基金的興趣其實仍相當薄弱。一來人仔一年遠期市場仍然睇緊貶值，二來買股票，講到尾要睇基本因素，失驚無神阿爺可以宣佈全國公路免收費，公路股本身冇咩吸引力。買股票唔同買bond，如果最後賺息但要蝕價，更得不償失。
證券界人士話，合和公路係一隻樣板，唔好期望短期內會有第二隻人仔股票出現。講到尾，現時人仔流通量未成氣候，一日內地未開放港股直通車，人仔股票對資本市場嚟講，仍屬雞肋。
海迪