股評人黃偉康（Andrew）舊年拉埋藺常念同風水師楊天命搞證券行靈獅，開業近一年，Andrew就拜拜了。聽講有人搵佢幫手開過另一間證券行，家陣周圍都有C組證券行放盤，百幾萬有得傾，Andrew應該可以好快重出缸湖，唔使做「獨立股評人」好耐。
靈獅舊年10月尾開業，Andrew一直同人講，背後大老闆係新加坡人，佢之後亦有搵其他投資者入股，但冇下文。傳聞最近有新投資者X想入股靈獅，但同大老闆傾唔掂數，Andrew費事夾喺中間，結果X出優厚條件叫佢過檔，搞過另一間。
Andrew承認噚日係last day，將會幫X物色證券行。
買證券行百幾萬有交易
早幾年好多內地券商要嚟香港發展，搶高晒證券行價錢，舉例，許照中舊年同六福（590）主要股東私人合資搞六福金融，大約用咗300萬買起一間小型證券行，呢間行當時只係得一個證券牌咋。搶證券行高峯期，有人甚至叫價700萬至1000萬放盤，諗住內地人出得起錢吖嘛！
內地人可能學精咗，加上港股交投低迷，生意難做，近期放盤價收歛好多。聽聞有齊兩個證券牌兼一個資產管理牌嘅證券行，叫價250萬至300萬。只得證券牌嘅，百幾萬有得傾，反映部份C組證券行老闆實在意興闌珊，賣盤執到幾多就幾多，費事煩。照咁睇，Andrew好快有新動向。
李華華
mailto:[email protected]