【牛腩篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
前律政司司長公開批評香港今時今日嘅司法界人士，唔了解偉大祖國嘅情況，引起軒然大波，呢個老婦人事後就指，自己有言論自由，司法界唔應該禁止佢講嘢。曼聯領隊費格遜同樣輩份高，佢講嘅嘢唔單止成為英國報章翌日頭條，但佢用本身言語偽術嚟維護麾下球員，但又知唔知會摧毀緊英國足球壇。其實小弟都好欣賞費Sir，成70歲人，乜盃都捧過都仲對勝利咁執着，佢嘅執着性格就表現喺佢嘅言行度。上月嘅英超雙紅會，路爾斯華倫西亞有插水之嫌博到12碼，由尹佩斯射入2:1反勝，賽後就有記者問費Sir覺唔覺得12碼有問題，佢就講自己坐好遠，睇得唔清楚。到周日英超作客車路士，費Sir對老眼忽然間又冇昏花，仲好清楚咁睇到莊尼伊雲斯係有少少接觸費托，但費托係可以繼續推進，費托因插水而領第二黃被逐，係好合理。除咗史丹福橋球場嘅看台視野，遠比晏菲路球場好，否則同樣千鈞一髮嘅環境，費Sir一個睇唔到，一個睇得咁清楚，又或者係費Sir嘅視線，係識選擇性睇嘢。當然批評球證偏幫曼聯，同批評溫爺爺嘅家人坐擁億萬財產一樣，大家都搵唔到費Sir同溫爺爺直接嘅罪證，爭論係沒完沒了；費Sir對英超、甚至英國球壇都貢獻良多，小弟衷心希望曼聯今季順利贏得英超冠軍，畀費Sir光榮退休，然後畀各隊一個真正公平競技嘅聯賽。文：牽牛