地產股升了幾個月,近排買的統統賺錢,有乜風吹草動,自然先沽為敬,人踩人怒掟,領匯(823)成地產股資金避風港,40蚊就快到,息率得番3厘,其實貴得幾離譜。
想打穩陣波,應揀盈利增長強或復蘇股,昨推介金蝶國際(268),基金大戶主導,8月首次叫買時1蚊左右,昨大成交突破向上,升至5月以來高位,收報1.69元,不妨坐定定等見兩蚊。另一愛股安東油田(3337),半年前推介,至今已翻一番,走勢靚爆!
近排魏力重點研究股之一係舜宇光學(2382)。過去半年已升了1倍,往績PE達16倍,睇落唔平,但業務前景佳,盈利增長勁,預測PE料回落至單位數,股價破頂在望。
舜宇主攻智能手機鏡頭及數碼相機鏡片等業務,目前主要接聯想集團(992)、中興通訊(763)、華為及諾基亞定單,代工做500萬、800萬及920萬像素鏡頭,三星亦係佢大客。受惠智能手機普及化,過去4年純利累飆兩倍,主攻中檔手機,有利爭取新興市場定單,隨着手機鏡頭像素越做越高,舜宇的技術優勢將更明顯,有利提升毛利率。
野村報告估計舜宇今年EPS可達0.574人仔,即現價預測PE得6.5倍,以9倍PE為目標,可見6蚊!
魏力
http://www.facebook.com/2012jason