噚日內地微博瘋傳內房龍頭企業萬科董事長王石搭上新歡，同太太王江穗離婚，結束34年婚姻。疑似第三者係內地演員田樸珺，芳齡31歲，同王石相差30年，佢喺蔡少芬主演嘅內地宮廷劇《甄嬛傳》入面做「敦親王福晉」，一輯火辣寫真最近因為緋聞被網友翻鋪再翻鋪。
王石77年大學畢業後，就同當時廣東省委副書記王寧個女王江穗結婚，雖然一直有傳王石同老婆已經分居廿年，但兩人冇澄清過。
直到噚日，網友「慈冰CAIJING」喺微博放咗一張王石同田樸珺嘅機艙相，疑似婚外情曝光，有網友仲爆料話，王石為咗新歡，願意離婚後將財產分晒畀前妻。
王石喺微博上話冇背叛家庭，指「個人感情是非常個人化的事，西方叫Privacy，我希望全社會有保護個人隱私意識。」
佢咁講就唔啱，因為若搞到離婚同老婆分身家，萬科股權可能會有變動，投資者喺呢件事上面應該有知情權喎。