政府上周五推出「曾兩招」，其中一招，向非香港永久性居民，包括公司，收取樓價15%作為「買家印花稅」（BSD），呢招最多有錢人談論緊，事關好多有錢人鍾意用公司名義買樓，尤其係海外註冊公司，等人查唔到買家真正身份，又可以避稅，佢哋以後想用呢招，唔係話唔得，畀多15%囉。
用15%玩神秘 值咩？
好多富豪鍾意用公司買賣物業，事關轉讓公司可以省下一大筆印花稅，但只限於相熟朋友之間先會咁做，咁先唔怕對方隱瞞公司有其他債務。另一個好處就係隱藏自己身份。近年豪宅樓價不時出現天價，每逢有天價成交，大家最想睇相關嘅土地註冊處資料，睇吓買家係邊位，可惜，呢類買得起天價豪宅嘅買家通常唔想大家知道佢哋真正嘅身份。最經典莫過於恒地（012）天匯，恒地09年底話以天價4.39億沽出一伙，旋即引來全城傳媒發掘誰是買家，故事發展落去變成大批撻定同商罪科介入。近期啲，太古地產（1972）4.3億賣咗個OPUS傲璇8樓單位，由於又係以公司名義買，買家身份只有佢本人先最清楚。有咗BSD之後，公司買樓就要先畀15%，想隱藏身份嘅買家，斷估冇理由畀多15%樓價來買個神秘身份啩，假設4億買件貨，BSD要6000萬喎，呢個數買多間細嘅都得啦。諗諗吓，呢招除咗趕走炒家，仲嚇走神秘買家，唔知邊位高人諗出來呢。李華華mailto:[email protected]