恒指單日調整，跌番去金管局入市干預港元時水平，理應有支持；加上9RSI上周四升上86.2極超買水平，按往績會做個RSI頂背馳，換言之，恒指至少短線會再破多次頂。既然港股好大機會繼續去，就毋須見到調整即腳軟，繼續做好友。10月鐵礦石價格反彈，鐵貨（1029）爆升近倍，大家睇到O晒嘴，可惜晉佳冇份，家可以留意佢隻鄉里俄鋁（486），理念好簡單──博鋁價反彈！俄鋁有幾個特點，公司背景複雜、低成本優勢、負債重，作為投資者，單睇公司盈利基本因素，佢比中鋁（2600）勝在生產成本低，毛利率較高。比較今年上半年，俄鋁毛利率18%，中鋁只得0.3%，俄鋁上半年盈利大跌95%至3700萬美元，主要原因係有一項非流動資產減值2億美元。撇除非經常性項目，面對相同行業環境之下，俄鋁嘅盈利能力相對會較高。至於對鋁價嘅敏感度，俄鋁亦比中鋁高。中鋁近排股價上升，多少係受到港股強勢帶動，俄鋁就繼續低位徘徊，股價中長期偏向跟住鋁價走，近排鋁價偏弱，俄鋁當然升唔起。9月中至今，鋁價一直尋底，倫敦期鋁由每噸2200美元跌至上周五接近1932美元，已經去到1850至1900美元嘅強大支持區，如果鋁價喺現水平回穩，又會形成9RSI底背馳，都係見底訊號。此外，內地氧化鋁庫存最近去到兩年高位，負面消息都浮晒上面，中短線似乎冇乜大跌空間。
睇升逾兩成見5.5元
另外，叫得做俄鋁，當然受俄羅斯貨幣盧布影響。盧布兌美元6月至今都係大漲小回，暫時未睇到滙率風險會拖累俄鋁，中短線少一項變數。雖然鋁價暫時未見反彈，但係俄鋁股價近幾日就有番多少動靜，上周三升完一棍，喺周四、五震番落嚟，成交比月初稍為活躍番啲，似乎現價可以落定Part，買少少坐住，見股價正式起動時追入。睇隻鄉里鐵貨10月由低位爆升，就係由低位起步衝番上去4月低位1蚊左右，如果博到鋁價反彈，俄鋁隨時步鐵貨後塵，有本事打番上去4月低位5.50元水平，就以呢個位做目標價，回報超過兩成，跌穿4蚊止蝕。晉佳本欄逢周一、三及五刊出