運輸及房屋局副局長邱誠武，過去都有參加過港鐵舉行嘅競步賽；由曾班子過渡至梁班子，邱武繼續落場參賽。對於平時都有運動開嘅佢，競步本來真係一啲難度都冇；但邱武卻喺今年比賽前夕，唔小心整親隻腳，為此佢唔單止減少咗練習，更擔心未能趕及復元落場，好彩佢隻腳最終都好生性，令佢噚日可以按計劃去比賽。事實上參加「主席邀請賽」嘅佢，真係有姿勢又有實際，仲一直同港鐵主席錢果豐鬥得難分難解，佢哋都好似各自以對方為假想敵咁噃。港鐵話邱誠武最後以7分16秒完成賽事，啱啱打入十大。喺40幾名參賽者中成績算唔錯。唔知佢喺港鐵加價問題上，又會唔會死咬住錢果豐唔放呢？