鬥入最後直路：日聯
經過上周末賽事，日聯將小休至下月7日，今季尚餘4輪，3線爭持激烈，好睇之餘對賭友又好刨。爭霸仙台同三箭，前日幾同時入波，最後各自同對手言和，現時當然三箭有優勢，淨係下戰迎回復魚腩本色嘅札幌都夠數，有擴大得失球優勢嘅白金機會；爭第3踢亞冠盃仲有好多隊有機，「3哥」紅鑽轉沉，5、6鯨魚同柏雷素爾無復上季銳氣，反而「4哥」有射手保斯基跳船嘅心跳幾醒神。至於護級，飛腳仲係排尾3，肯定囉囉攣，原來9月尾大炒紅鑽嗰場，係假賽績！
命途多舛：昆士柏
阿仙奴能夠避開3連敗或3戰不勝兼0入球，真係要多得球證睇漏眼、多得從來熱血嘅曉士，教到一隊成日有球員攞紅牌嘅昆士柏流浪；唔係高大中堅麥比亞鹵莽領紅，阿仙奴之後唔會咁易，將啲波吊入中路畀基奧特撞得散對手。昆士柏今場冇咗老退嘅星仔，由格尼路發晒辦，班波仲爽，可惜下場護級大戰焗住要用番安頓費迪南，頂住雷丁嘅嘅俄國坦克普格恩耶克；呢場波初步睇「大」戰可期，雷丁始終守唔叻，轉受讓富咸贏盤唔贏波，其實自己有少少失望。
強勁「1哥」：卡城
英冠一定係一個爛盤路嘅聯賽，季初好嘅列斯聯同黑池，已跌出前10；啱啱前列又有李城同哈特斯菲爾德兩支近況好嘅球隊失分；唯一一隊波長期企喺前3，講緊嘅係卡迪夫城。晨咁早喺聯賽未開鑼就先喺英聯盃自殺，早早出局反而可專注聯賽，10月聯賽錄得5戰4勝1負，唔好話喺英冠，英國各級聯賽計已係極好賽績；前線比拿美同希古臣，同中場韋定咸幾位老牌炮手入球數量穩定，啱啱又借到富咸年輕土耳其快翼基廉費爾，不斷有新衝擊，對班波係好事；但踏入下月未來兩仗要作客連鬥保頓同查爾頓，又睇吓佢哋仲有冇咁把炮，但賠率開得太辣，喺英冠不宜盲捧。蘋果波神