節日從來為商家而設，近年節日銷售增長最勁當然係萬聖節，就快跌落「財政懸崖」的美國，國民一於少理，零售商預期「哈囉喂」銷售額今年達80億美元。香港都唔執輸，海洋公園舊年10月錄得近70萬人次，今年料增一成半，除咗Marketing了得，亦關乎大家鍾意被嚇的心態。讀書年代去「哈囉喂」，每次都被嚇得花容失色，近年心血少，無謂畀錢請人嚇自己。再者，日日在股市殺戮戰場仲唔夠驚嚇？入鬼屋嚇餐死只是精神煎熬，但冇發盈警下業績走晒樣，損失的可是血汗錢，上周五馬鋼（323）公佈上季勁蝕12億人仔，即日勁跌7%。搞活動展覽提升形象，似乎是消費品必要開支，Samantha膽小，還是選較穩陣的做展覽及項目市場推廣的筆克遠東（752），在全球經濟轉差下，中期純利仍升13%；剛做完南韓麗水世博、倫敦奧運、新加坡F1，還有天津東亞運、南韓仁川亞運等搞作，有業務支撐下，市盈率僅9.2倍，可於升破1.92元買入。Samantha本欄逢周一、三、五刊出