噚日喺沙田馬場碰見低調到不得了嘅股壇阿姐譚毓楨（Jenny），久未公開露面嘅佢保養得好好，佢同金利豐（1031）老闆娘朱李月華原來仲係老友鬼鬼，一見到就雞啄唔斷。
曾與安仔傳緋聞
Jenny繼續保持低調作風，問佢最近忙緊乜，佢好有禮貌、笑笑口話搞緊自己啲投資，咁就劃句號，其他都係留番同朱太講。
查實Jenny一早搵埋唔少，聽聞有過億身家，唔使點做，最為人津津樂道，大概係八年前同歌手許志安傳過緋聞。舊年，擁有法拉利代理權嘅和記行（現易名為意達利）（720）被人狙擊，市場傳聞佢都有份參與，都係低調食大茶飯嗰種。
至於朱太，佢唔算係馬場常客，主要係佢今年初收購咗代理「Frank Muller」名錶嘅先施錶行（444），噚日有行家喺馬場搞show，佢就孖埋阿仔朱俊浩一齊出席搞聯誼。