所謂「醜婦終須見家翁」，QE3帶來的復蘇憧憬，俾美國企業季績一盤冷水淋熄了，新一輪降級潮一觸即發，加上明年面對「財政懸崖」，美股隨時大調整。西班牙四分之一人失業，人數近600萬人，差唔多係香港人口總和，嚇死人！咁多量地官，唔暴動都偷笑，經濟點復蘇？港股方面，上周魏力講過熱錢都係短暫泊港，順便短炒搵食，一見唔對路就會撤退，升得急自然跌得快，加埋A股又尋底，11月市況不容樂觀。最近換新iPhone時問Sales：「如果64GB唔夠用，又唔想鏟資料，有乜計？」佢不屑地答：「擺上Cloud囉！」又係喎！雲端運算發明咁耐，魏力真係未用過，始終放上「嚿雲」度，唔知安唔安全。不過，主力向中小企提供軟件管理服務的金蝶國際（268），今年推出多款「雲管理」移動智能終端，讓企業可突破地域、時間、組織與IT資源的限制，無論何時何地都可進行管理，大大提升企業管理效率，成為金蝶下半年盈利翻身的殺着。金蝶市值雖然只有41億銀，但獲多家基金青睞，美國資本集團及富達基金現持股逾6%。魏力8月於1蚊附近曾作推介，至今賺近六成。金蝶近日走勢硬淨，外資大行買盤不絕，似乎要食大茶飯。跟勢炒一轉，兩蚊食糊！魏力