第六屆對冲基金拳賽Hedge Fund Fight Nite上周五舉行，今年繼續喺銅鑼灣印度遊樂會搞，芬佬除低套裝帶起拳套肉搏連場！七場賽事中，滙豐派員參加其中三場，而且三場全勝，查實賽事舉辦以來，滙豐選手未逢敵手，相比林鄭，呢啲先叫「好打得」囉。
咁好打當然要大力支持，滙豐係訂枱最多嘅基金公司，47張枱訂咗5張。
一拳見血好angry
現場所見，綽號Angry Gary嘅滙豐選手Richard Rouse，一打對手就見血，搞到對手要療傷幾次，最後佢輕易取勝兼贏埋全場最佳拳手。唯一女子組就由慈善組織「微笑行動」嘅Danielle對滿地可銀行Andrea，Andrea箍住人哋條頸打咗三四次，睇落好打啲，但最後輸咗點數。雖然打得兇狠，但完場後兩位一齊搵浴室冲番個靚凉，講到尾，都係一場比賽啫。