玩緊嗰陣，想捕捉最清晰、最靚嘅一刻，貴為拍攝新仔，當然唔易掌握！與其慢慢揣摩技巧，倒不如靠相機新分唇搭夠，講緊就係Nikon 1系列第二炮V2！今次除了外形大改造，更追加40格慢鏡搜畫功能，畀你揀到一張Sharp為止，針對動態拍攝環境，絕對一流！ 記者：陳國輝 攝影：潘志恆 模特兒：[email protected]
慢鏡專掣 按半下即睇
此分唇官方叫「慢速查看模式」，原理就類似一部識預錄嘅攝錄機，超過癮！當你啟動V2轉盤上嗰粒專用掣，再按半下快門，佢就即時將畫面轉化為40格影像，再不斷重複以慢鏡播放。好喇！當你選中其中一幅相，就可以按多半下快門，影低佢；形式近乎逐張畀你Hea住揀，唔靚揀到靚。試玩效果都幾令人滿意，起碼一學即刻上手，而且操作流暢，就算選擇最高1,425萬像素拍攝，都唔覺得有拖泥帶水問題。但講到底，呢項分唇只提供全自動模式，無得調校光圈、快門、感光度等數值，可以話至啱入門拍友或者鍾意簡單操作嘅朋友，但如果你係慢功出細貨嗰種發燒友，未必啱你囉！
機身改造 握手位貼服
雖然Nikon頭炮V1尚算稱之為可換鏡頭相機，但感覺真係太平庸！個人認為最關鍵係過份圓滑嘅Body，皆因唔少人批評呢個設計，攞上手又太滑，加上欠缺熱靴閃燈位，入門程度近乎儍瓜機一部。好彩，第二代V2即改頭換面，最抵讚係個凸出形手柄，有人話佢似當紅NEX，亦有人認為佢似舊時嘅「女朋友」，但點講都叫實用，而且表層加入防跣膠，握上手特別貼服；另外，當內置i-TTL閃燈唔夠用，V2機頂亦預留熱靴位，畀你加裝Nikon同步公佈嘅Speedlight SB-N7閃燈，有黑、白兩隻色，可以襯番部機。
官方試相
1 NIKKOR VR 30-110mmf/3.8-5.6鏡頭、1/800快門、f/5光圈、ISO160感光值
1 NIKKOR VR 10-30mmf/3.5-5.6鏡頭、1/1250快門、f/5光圈、ISO200感光值
同場架生：靜音長炮王
除了細機，Nikon亦為鍾意遠攝嘅發燒友，推出兼容FX格式長炮王！呢支AF-S尼克爾70-200mm f/4G ED VR鏡頭，搭上減震技術後，唔只提供遠距離「射」程，同時可作1米最短對焦距離，補足近攝需要，加埋自動對焦夠晒寧靜，拎去米埔影雀，都唔怕騷擾到佢哋！
Nikon 1 V2
影相感應器：13.2×8.8 mm CMOS
有效像素：1,425萬
重量：337g
顏色：黑、白
記憶卡：SD、SDHC、SDXC
體積：107.8×81.6×45.9mm
推出日期：11月
售價：待定（淨機、單鏡及雙鏡套裝）
