【中環蘭桂坊】
黃長發鍾意媾女已經唔係新聞，但估唔到佢已為人夫嘅哥哥黃長興亦唔輸蝕，噚日凌晨佢同新婚太太Peggy去蘭桂坊提早開哈囉喂派對，黃長興竟敢當住老婆大人面前撩鬼妹仔，認真大膽。
撩女激親老婆
黃長興今年7月同拍拖三年女友Peggy喺法國註冊結婚，噚日凌晨1點同成班朋友喺老蘭嘅Fly提早慶祝哈囉喂，黃長興戴住拉登面具，佢老婆同成班女仔就着晒軍裝揸晒槍扮軍人。雖然室內地方嚴禁吸煙，但黃長興一於少理，全程煙駁煙食唔停。成班人玩到凌晨4點先捨得離開，點知佢有個女仔friend飲醉酒醉到不省人事，黃長興即場上演一幕英雄救美，好man咁抱住個friend離場，跟住放低對方喺門口休息。
成班人喺門口擾攘一輪後，黃長興準備同老婆離開，咁啱有兩個鬼妹仔行過，黃長興竟然當住老婆面吹口哨撩女仔，激到佢老婆指住黃長興責怪，黃長興即刻知衰，於是急急拖住老婆番，然後一齊搭的士離開。
採訪、攝影：陳辰、朱志聰、吳耀輝
